قصائد ذوق کے امتیازات

26th Issue 11 Apr 21

اصناف شاعری میں قصیدے کی اہمیت و افادیت سے کسی کو انکار نہیں لیکن یہ صنف شاہانِ وقت اور حالات کے متقاضی نمو پذیر تھی ۔ یہ اپنے عہد میں خوب پلی پڑھی اور پھلی پھولی ۔اس صنف کو زیر قلم پروان چڑھانے والوں میں نصرتیؔ ،ولیؔ ،شاکر ناجیؔ ،سوداؔ ،انشاؔ،مصحفی ؔ، غالبؔ ،مو منؔ ، اسیرؔ ،امیرؔ ،منیرؔ ،نسیمؔ ،محسن ؔوغیرہ بہت اہم ہیں ۔یہ صنف اپنے ابتدائی دور کے دکنی نامور شعراء نے مثنوی کی تحت حمدیہ ، نعتیہ،منقبتیہ اور نظمیہ قصیدے کی شکل میں مشتاق ،لطفی ،قلی قطب شاہ ،غواصی ،نصرتی ،ولی دکنی کے ذریعے ہو تے ہوئے شمالی ہند میں قدم رکھتی ہے ۔عہد زرّ یں میں سوداؔ اور ان کے معاصرین نے اس صنف کو بام ِ عروج پر پہنچا یا تو ذوقؔ ؔ نے اس میں مزید تقویت اور عروجیت عطاکی ۔

قصائد کے حوالے سے اکثر نا قدین سودؔا اور ذوقؔ کے مابین تقابلی مطالعہ کے ذریعے ایک دوسرے کی کمیوں اور خامیوں کو اجا گر کر تے ہیں جب کہ دونوں اپنے عہد اور وقت کے اعتبار سے بہت بڑے شاعر تھے ۔ہر شاعر خوبیوں اور خامیوں کا مالک ہو تا ہے بلاشبہ سوداؔ قصیدے کے سَرْخِیل اور نقاش ِ اول کی حیثیت سے جانے جا تے ہیں کیونکہ سودا نے ہی باقا عدہ اصولی اندازمیں زیر ِ فارسی اردو قصائد کی بنا رکھی اور اسے وہ مرتبہ عطاکیا جسے انوریؔ ،خاقانیؔ ،عرفیؔ و ظہوریؔ نے قصائد ِ فارسی کو اوجِ کمال پر پہنچایا تھا ۔یہی وجہ ہے کہ سوداؔ کے قصائد کا اعتراف و احترام ان کے معاصر اور مابعد شعراو ادبا نے خوب کیا ہے ۔سوداؔ خود کہتے ہیں کہ :

لو گ کہتے ہیں کہ سواد کا قصیدہ ہے خوب

ان کی خدمت میں لیے میں یہ غزل جا ؤنگا

اس طرح سوداؔ کے بعد تمام قصیدہ نگاروں میں شیخ محمد ابراہیم ذوقؔ سرِ فہرست نظر آتے ہیں۔جن کے قصائد دیگر قصید ہ گو کے مقابلے انفرادیت کے حامل ہیں ۔ذوق کے حوالے سے اکثر ناقدین لکھتے ہیں کہ انہوں نے حمد ،نعت ،منقبت وغیرہ نہیں لکھے ہیں بلکہ ان کے قصائدبادشاہوں کی شان میں مکمل مداحی ہیں ۔یہ بات درست ہے لیکن ہمیں یہ بات بھی ذہن نشیں رکھنی چاہیے کہ ذوق جیسا پڑھا لکھا انسان ،عربی وفارسی پر مکمل عبور ،لفظوں کی بازی گری سے کھیلنے والا شخص عارضی شاہوں کی مداحی کر ے اور اس حقیقی خداوند قدوس جس کے ارض و سما کے ما بین زندگی معلق ہے۔ اس کو وہ بھو ل جائے یا عظمت ِ حضوری یا منقبتی قصائد نہ لکھے یہ سمجھ سے بالا تر ہے ۔جب کہ مولانا محمدحسین آزاد اس بات کی طرف اشا رہ بھی کر تے ہیں کہ ۱۸۵۷ء کے حالات نے ان کے گھر کو جلا کر راکھ کر دیا جس سے ان کا کُل سرمایہ ٔ حیات خاکستر ہو گیا جو بچا کچھا دستیاب ہوا وہ ہمارے سامنے ہے مزید آزاد لکھتے ہیں کہ ان ہی میں سے چند منقتبی اشعار بھی دستیاب ہوئے ہیں ۔ان کا ایک قصیدہ ٔ ناتمام’’درمنقتب حضرت امام حسین ؓ‘‘ ہے۔ اس کے صرف چار اشعار دیوانِ ذوق مرتبہ مولانا محمد حسین آزاد میں درج ہے ۔مطلع دیکھیں :

لکھوں جو میں کوئی مضموں ظلم چرخ ِ بریں

ڈاکٹر محمد ارشد

تو کر بلا کی زمیں ہو میری غزل کی زمیں

اسی طرح حضرت علی ؓ کی شان میں بھی انہوں نے قصیدہ کہے لیکن جنگ ِ غدر میں تلف ہو گیا ۔شعر دیکھیں :

کر ے ہے مہر ِ علی دل کو صاف پُرانوار ٭ طلوع ِ شمس پہ مو قوف ہے وجود نہار

علی سے کیوں نہ ہو زیرلشکرِ کفار ٭ علٰی ہے حرف علی اور علٰی ہے حرف جار

اس طرح ذوق کے حمد ،نعت ،منقبت میں کوئی مکمل قصیدہ تو نہیں ملتا اور نہ ہی ان چو بیس مدحیہ قصائد کے علاوہ دیگر کو ئی قصائد دستیاب ہے۔

ان تمام چیزوں سے انحراف کر تے ہوئے ذوق ؔ،سوداؔ کے بعد اردو زبان کے سب سے بڑے قصیدہ نگار ہیں ۔انہوں نے اپنی عہد جوانی کو اکبر شاہ ثانی کی مدح میں اور باقی زندگی ‘بہادر شاہ ظفر کی ثنا خوانی کے لئے وقف کر دیا ۔ذوقؔ کے کلام سے یہ اندازہ ہو تا ہے کہ انہوں نے اپنی فنّی خلاقانہ صلاحیتوں کو بَرُ وے کارلاتے ہوئے سودا ؔکے قصائد کی خوب پیروی کی لیکن اس بات سے بھی انکار نہیں کیا جا سکتا ہے کہ ذوقؔ کے مطالعہ میں شعرا ئے کلام ِ فارسی بھی ضرور تھی کیونکہ ان کے قصائد انوریؔ ،خاقانیؔ ،عرفیؔ اور ظہوریؔ وغیرہ کی زمین بھی دستیاب ہے۔ذوقؔ نے خاقانی ؔکے علمیت اور فنی مصطلحا ت کو براہ راست قبول کیا ہے ۔

سوداؔ اور ذوق ؔکے عہد کی لسانی خط و خال میں کافی تبدیلی آچکی تھی ۔عہد ذوق میں زبان ترقی کر کے کافی صاف اور شستہ ہو چکی تھی ، اپنے خیالات کو واضح طورپر پیش کر نے کے امکا نا ت زیادہ وسیع ہو گیے تھے ۔ ذوق ؔنے اپنے قصیدوں میں زبان و بیان کے فنی امکانات کو بڑی خوش اسلوبی کے ساتھ سمویا ہے ۔لفظوں کی شان و شو کت ،تراکیب کی بندش ،الفاظ کی ادقیت اور بلند آہنگی سے قصید ے کی عظمت کو چار چاند لگا یا ۔سوداؔ کے مقابلے ذوق کی زبان زیادہ صاف او ر رواں ہے لیکن فکری میلانات ،ذاتی مشاہدات کی کمی کے باعث وہ بات نہیں جو سودا ؔکے قصائد میں دکھتی ہے ۔تنویر احمد علوی لکھتے ہیں :

’’ذوقؔ اپنے مذاق ِ علمی کی تکمیل کے لیے اس زمانے کے اہل ِ فن اور اصحاب علم کی خدمات میں برابر حاضر بھی ہو تے رہتے تھے ۔ اسی لیے نسبتاً کم عمری میں انگشت نمائے خلق ہو گیے اور اس زمانے کے معیار فن،قدرت ِ کلام ،حسن ِ بیان اور لطف ِ زبان کے اعتبار سے ان کا کلام سند سمجھا جا نے لگا ۔قصائد کا زور و شور تو اور بھی غیر معمولی ہے ۔ذوقؔ اپنے شعورِ فن اور کمال ِ شاعری کے لحاظ سے اپنے خاندان یا اپنی شخصیت کے نہیں دہلی کی شعریت کے نما ئندہ ہیں ‘‘۔(ذوق دہلوی ایک مطالعہ ۔مرتب شاہد ماہلی )

یہاں یہ بات بھی قابل غور ہے کہ حالی کے نظر یے کے بعد قصیدے کی فکری جہت میں کا فی تبدیلی آنے لگی اور اسے دَور گزراں کی چیز سمجھی جا نے لگی جب کہ حقیقت یہ ہے کہ قصیدہ نگاران ِ ‘خاص طور پر ذوقؔ اپنی علمی و فنی نقطہ ٔ نظر سے اپنے وقت کے مروجہ علوم و فنون کی تاریخ کو محفوظ کر نے میں کا میاب نظر آتے ہیں اسی لیے انہیں علمی و فنی مصطلحات کے امام ِ اعظم کہا جا تا ہے لیکن وہیں ایک دشواری یہ بھی آتی ہے کہ ذوق نے اپنے شعروں میں متداولہ علوم اور فنی مصطلحات کو برتنے سے آج کے ترقی یافتہ دور کے تعلیم یافتہ طبقہ ان قصیدوں کے فہم و فراست سے بہت دور ہیں ۔

ذوق ؔعلم و فضل کے دلدادہ نظر آتے ہیں کیونکہ فارسی کے عظیم قصیدہ نگار خاقانی جو علمی اصطلاحا ت کے پیمبر مانے جا تے ہیں ان کے نقش قدم پرچلتے ہوئے ذوق ؔنے انیس سال کی عمر میں اکبر شاہ ثانی کے دربار میںایک ایسا قصیدہ پڑھا جس میں علمی و فنی مو ضوعات قلمبند تھے ۔یہ قصیدہ اٹھارہ شعرمیںاٹھارہ زبانوں پر مشتمل تھی ‘جسے کئی طرح کی صنعتوںسے مزین کیا گیا تھا۔یہ قصیدہ ان کی علمیت کا اشارہ دیتی ہے لیکن یہ قصیدہ اب نا پید ہے ۔جس کا ذکر مختلف کتابوں میں مو جود ہے ۔اسی قصیدے کی بنیاد پر اکبر شاہ ثانی نے انہیں خاقانی ہند کا خطاب عطافرمایا تھا۔ شعر دیکھیں :

جب کہ سر طانُ و اسد مہر کا ٹھہرا مسکن

آب و ایلو لہ ہوئے نشو و نمائے گلشن

ذوق کے قصائد کے مطالعہ سے یہ اشارہ ملتا ہے کہ ان کے عہد میں حالات ساز گار نہ ہو نے کے باوجود علمی اکتسابات اور ادبی فتوحات غیر معمولی تھے ۔ہر ذی علم اپنے علم دانی سے غرور و نخوت کا پر چم بلند کر رہا تھا۔ذوقؔ نے بھی اپنے ایک قصید ے میں مشرقی علوم و فنون ،منطق و فلسفہ ،نجوم و ہیئت ،موسیقی و طب ،تفسیر و حدیث ،تاریخ و تمدن وغیرہ سے آراستہ کیا ہے ۔

مزے لیتا تھا پڑا علم و عمل کے اپنے

تھا تصور میرا ہرامر میں تصدیق صفت

کبھی ہمت تھی میری قاعدہ ٔ صرف میں صرف

کبھی تھی نحو میں ہر نحو مجھے محویت

کبھی میں کر تا تھا تصریح معانی و بیاں

کبھی تعلیم عقاید بکتاب و سنت

ہو گیا علم حصو لی تھا مصوری مجھ کو

تھا مرا ذہن نہ محتاجِ حصو لِ صورت

ذوق کُتب بینی کا شوق رکھتے تھے اپنے عہد کے علماء کرام یا اسلاف میں علماء و ادبا کے کتابوں پر بھی ان کی نظر تھی ۔ذوق اپنے شعروں میں مختلف علوم کی کتابوں کا تذکرہ بکثرت کر تے ہیں ۔عہد شاہ جہانی میں چند ر بھان نامی شاعر جس کا تخلص بر ہمن تھا اس کے فارسی خطو ط کا مجموعہ ’’انشائے برہمن‘‘ ہے یا پھر فلسفہ کی کتاب ’شمس بازغہ ‘ اور میر حسن کی مثنوی سحر البیان کی شہزادی بدر منیر کے کردار کاذکر ہو ۔ شعر دیکھیں :

تیرے حکم شرع سے جب کفر دریا بردہو

غرق ہو وے تابہ انشائے برہمن آب میں

ہوا ہے مدرسہ یہ بزم گاہ عیش و نشاط

کہ شمس بازغہ کی جا پڑھیں ہیں بدر ِ منیر

وہیں ذوقؔ کا علم ِ نجوم سے رغبت اور دلچسپی کا یہ عالم تھا کہ جگہ بجگہ اس کا تذکرہ ملتا ہے ۔شاید ہی کوئی قصیدہ ایسا ہو جہاں کسی ستارے یا بُرْج کا ذکر نہ ہو ۔علم نجومیوں کے مطابق ستاروں کو کسی نہ کسی منصب سے تعبیر کیا جا تا ہے ۔یہاں درج ذیل اشعار میں سعدِ اکبر کو مشتری، عطّاردکو منشی ٔفلک اور ترک گردوں کو مِرّیخ ستارے سے تعبیر کیا ہے ۔ذوق ؔنے اسے یوں بیان کیا ہے ۔

سریر آرائے گردوں جب تلک سلطانِ خاور ہو

قمر دستور اعظم ،صدر اعلی سعد اکبر ہو

عطّارد میر منشی ،زہرہ نا ظرِ آسماں پر ہو

زحل میر عمارت ،ترک گردوں میر لشکر ہو

سرِ ہفت آسماں جب تک کہ دور ہفت اختر ہو

الہی یہ بہادر شاہ شاہ ہفت کشور

قصائداپنے لب و لہجہ میں گھن گرج آواز چاہتا ہے لیکن ذوقؔ باعتبارِ سادہ شخصیت کہ اسلو ب میں بھی سادگی کا اظہارملتا ہے۔ وہ گھن گرج ان کے کلام میں نہیں جو سوداؔ کے یہاں نظر آتا ہے۔ اس کے باوجود ذوقؔ بھاری بھر کم الفاظ ،ثقیل تراکیب سے اس کمی کو بڑی حد تک پو ری کر دیتے ہیں ۔اس لحاظ سے ان کے قصیدوں کے اجزائے ترکیبی میں بڑا توازن نظر آتا ہے ۔تشبیب کے ذریعے ذوق نے اپنی صناعی اور فنکارانہ صلاحیت کا بھر پور مظاہرہ کر تے ہوئے تشبیبوں میں غضب کا حسن پیدا کیا ہے ۔اس کے ذریعے انہوں نے آسمان و زمین کی شکا یت ،فخرو تعلّی اور علم و ہنر کی ناقدری کا بیان وغیرہ نِت نئے انداز میںبیان کیا ہے ۔

قلم جو صفحہ کا غذ پہ ہوئے نکتہ نگار ٭ تو اپنے نقش مٹادیں جہاںکے جادو کار

یا پھر

شب کو میں اپنے سرِبستر ِخوابِ راحت ٭ نشۂ علم میں سر مست و غرور و نخوت

یا پھر صبح سویرے کایہ منظر:

دی ہے مسجد میں مؤ ذن نے اذاں بہر نماز ٭ با وضو ہوکے نمازی نے ہے باندھی نیت

ہوئی بت خانہ سے ناقوس کی پیدا آواز ٭ چلے جمنا کو برہمن کوئی لے کے مو رت

اک طرف سے ہوئی گھڑیال کی آواز بلند ٭ ایک جانب سے لگی آنے صدائے نو بت

گریز میں ذوقؔ کا کوئی خاص مقام نہیں بلکہ فرسودہ روایات کی تقلید نظرآتی ہے لیکن مدحیہ اشعار کے ذریعے خوب طبع آزمائی کی ہے۔ جس میں انہوں نے پورا زور بیان، بلندی ٔ خیال اور پرواز فکر کا جوہر دکھانے کے ساتھ ساتھ پر شکوہ الفاظ سے نئے معنی و مفاہیم پیدا کرتے ہیں ۔ممدوح کے مراتب کے اعتبار سے ان کے شایان ِ شان تعریف ،ان کی شجاعت ، اوزارِ حرب ،خدمت خلق ،عدل و انصاف کا نعرہ بلند کرتے ہیں ۔چند اشعار ملاحظہ ہو :

سارے پڑھے اسمائے الہی سب ہیں موثّر اے شہِ اکبر ٭ اسم جو اعظم ہے تو وہی ہے جس سے ہے تیرا اسم ِمسمّٰی

ابو ظفر ،شہِ والا گُہر ،بہادر شہ ٭سراجِ دینِ نبی ،سایہ ٔ خداے قدیر

جو ہر سے تیری تیغ کے دکھلائے ہے قضا ٭سرکش کو لکھ کے حرف بحرف آیت عذاب

الغَرَض ذوقؔ کے قصائد میں زندگی سے متعلق تمام چیزیں اسماء و علائم ،طبقات و ملل ،اسلامیات و مقامات ،خطاطی ،آتش بازی ،ہا تھی او ر گھو ڑے کے متعلقات ،فنّ سپہ گری ،ملبو سات و زیورات ،معدنیات ،نباتات اور فارسی و عربی کے ضرب الامثال محاورے وغیرہ خوب ملتے ہیں۔ انہوں نے اپنے عہد میں شاہوں کے دربار سے خو ب واہ واہی تو ضرور لو ٹی ہے لیکن حالات ِحاضرہ کے تحت ان کے قصائد میں علمی و فنّی اصطلاحات کی بھر مار سے اشعار بو جھل نظر آتے ہیں۔عہد ِ میر کی سیاسی،سماجی اورمعاشرتی احوال و کوائف کو سودا نے اپنے قصیدوں اور شہر آشو ب میں خوب بیان کیاہے لیکن وہیںانیسویں صدی کے نصف آخر سے قبل کے حالات و واقعات کسی سے مخفی نہیں۔ غالب کی شاعری اور ان کے خطو ط اس عہد کی ترجمانی کر تے ہیں لیکن ذوق کی قصید ہ نگاری اس دور کے احوال کو بیان کر نے سے قاصر نظر آتے ہیں وہ سودا کی طرح شہر آشوب لکھ سکتے تھے لیکن وہ اپنے مخصوص حالات کی وجہ سے مجبور ،ذہنی اپج بھی کالمعدوم جو ان کی عصری حسیت کو بیدار کرتا ۔ان تمام چیزوں سے مبرأہو کر یہ تسلیم کر نا کہ انہوں نے اپنی علمیت ،مضمون آفرینی ،مبالغہ آرائی ،صنائع و بدائع کے استعمال سے قصائد کے تمام کمیوں کو دور کردیا ہے۔

پرہیز میرا یہ ہے کہ تقوے سے ہے گریز

تقویٰ ہے میرا یہ کہ ہے تو بہ سے اجتناب

(ذوق)

٭٭٭