نام کتاب : مولانا ابوالکلام آزاد : ایک تاریخی مطالعہ

29th Issue, کسوٹی 16 Jan 22

مولانا ابوالکلام آزاد : ایک تاریخی مطالعہ

مصنف: ڈاکٹر عبدالعزیز عرفان

مبصر: سنتوش کمار

ریسرچ اسکالر، شعبہ اردو، دہلی یونی ورسٹی، دہلی

صفحات: 160

قیمت: 150روپیے

ناشر: حضرت برہان الدین غریب اکیڈمی ، خلد آباد

فون نمبر: 9717028565

ہندوستان کی سرزمین پر مولانا ابوالکلام آزادکی شخصیت کسی تعارف کا محتاج نہیں ۔ وہ ہندوستانیوں کے دل وجان میں ہمیشہ زندہ ہیں ۔ ان کی شخصیت، عملی ، سیاسی ، سماجی اور ادبی حلقوں میں روشن ہوتے رہیں گی ۔ مولانا ابوالکلام آزاد1888ء میں ولادت ہوئی اور 1958ء میں وفات پائی ۔ وہ زندگی میں ہندوستان کی آزادی میں نہ صرف بڑھ چڑھ کر حصہ لیا بلکہ ہندوستانی سماج کے لیے ،ہندوستانی تعلیم کو بہتر بنانے کے لیے اپنی پوری زندگی قربان کردی ۔ انہوں نے ہندوستان میں اعتمادی کی ایک نئی جوت جگائی ۔ وقت در وقت اپنے اہل علم واہل ادب کو بھی اپنی تحریروں کے ذریعہ نہ صرف ہندوستانیوں کو متاثر کیا بلکہ پوری دنیا ان سے متاثر ہوئی ۔ ہندوستان کی آزادی میں بھی ان کی شخصیت بہت بلند نظرآتی ہے ۔ اس لیے مولانا ابوالکلام آزادکو کبھی بھی فراموش نہیں کیا جاسکتا ہے ۔

مولانا ابوالکلام آزادکی علمی ، ادبی ، سیاسی پہلوؤں پر نہ صرف روشنی ڈالی گئی ہے بلکہ ان کی وفات کے بعد ان پر بہت کچھ لکھا گیا ہے ، لکھا جارہا ہے اور آئندہ بھی لکھا جاتا رہے گا ۔ جیسے مالک رام نے ’تذکرہ غبار ِ خاطر‘ ،عرشی ملسیانی نے ’’جدید ہندوستان کے معمار مولانا ابوالکلام آزاد ‘‘ محمد ضیاء الدین انصاری نے ’’مولانا ابوالکلام آزاد‘‘ پروفیسر خلیق احمد نظامی نے ’’مآثر ابوالکلام آزاد‘‘ شورش کاشمیری نے ’’مولانا آزاد‘‘ قاضی عدیل عباسی نے ’’تحریک خلافت‘‘ محمد فاروق قریشی نے ’’ جیل میں آزاد‘‘ محمودالٰہی نے ’’انتخاب تذکرہ ‘‘ عبداللطیف اعظمی ’’سوانح عمری آزاد ‘‘ اور ضیاء الحسن فاروقی نے ’’ مولانا ابوالکلام آزاد ‘‘ وغیرہ لکھ کر مولانا آزاد کی ہمہ گیر شخصیت کو چار چاند لگائے ہیں ۔ اس طرح ان پر تمام کتابیں منظر عام پر آچکی ہیں ۔ یہ تمام کتابیں ان کے متعدد گوشوں کو اجاگر کرتی ہوئی روشن کرتی ہیں۔ دور حاضر میں بھی ان پر کتابیں اور مضامین شائع ہورہے ہیں ۔ اور آئندہ بھی ہوتے رہیں گے ۔ ہندوستان کی سرزمین پر مہاراشٹرا اسٹیٹ اردو زبان وبیان کے لیے بہت ہی زرخیز رہا ہے اورنگ آباد ضلع کے مشہور ومعروف درجنوںقلم کار ہیں ۔ جن میں ڈاکٹر عبدالعزیز کی تین درجن سے زیادہ کتابیں منظر عام پر آچکی ہیں۔ موصوف کی ’’مولانا ابوالکلام آزادوعدالتی بیانات کی روشنی میں‘‘ ،’’ گلدستہ ٔ آزاد‘‘ شائع ہوئی ۔ ڈاکٹر عبدالعزیز عرفان کی تازہ کتاب ’’ مولانا ابوالکلام آزاد:ایک تاریخی مطالعہ‘‘ آپ سب کی نظر ہے ۔ یہ کتاب مولانا آزاد پر تمام مختلف مضامین کا مجموعہ ہے ۔یہ کتاب تحقیقی اور بہت تلاش کے بعد مکمل ہوپائی ہے ۔ یہ کتاب مختلف موضوعات کا نہ صرف احاطہ کرتی ہے بلکہ معلومات بھی فراہم کرتی ہے ۔

ڈاکٹر عبدالعزیز عرفان کی مرتبہ کردہ کتاب ’’مولانا ابوالکلام آزاد: ایک تاریخی مطالعہ‘‘ مضامین کا مجموعہ ہے ۔ یہ کتاب ایک دستاویزی کی حیثیت رکھتی ہے ۔ اس میں کل 14مضامین شامل ہیں یہ کتاب ڈاکٹر شاہدہ مناف کے ذریعے منظر عام پر آئی ہے ۔ ڈاکٹر شاہدہ لمبے عرصے سے شعبۂ اردو راجہ چھتر پتی کالج بلڈانہ میں خدمات انجام دے رہی ہیں ۔ وہ اس کتاب سے متعلق لکھی ہیں:

’’ ڈاکٹر عبدالعزیز عرفان نے مولانا آزاد کے اہم موضوعات پر قلم اٹھایا ہے ،مولانا کی حیات ادب وصحافت اور سیاسی خدمات کو مختصراًور جامعیت کے کو زہ میں بند کیا ہے ۔ یقینا ان مضامین کی اشاعت سے طلبہ اور عام قارئین مولانا کے متعلق بہت سی معلومات حاصل کر سکیں گے ۔ یہ کتاب ان کے لیے ضرور مفید اور معاون ثابت ہوگی ۔ ڈاکٹر صاحب نے مولانا کے نئے نئے پہلوؤں کو سپرد قلم کیا ہے۔ان سب کا تاریخ کی روشنی میں جواب دیا ہے ۔ معروف اور معتبر مصنفین کے حوالے بھی دئے ہیں۔تاریخ نگاروں کی اہمیت مولانا آزاد کے تاریخی شعور کی خصوصیات مولانا آزاد کی تحریک آزادی میں شمولیت وغیرہ باتوں کا مفصل ذکر کیا ہے ۔ ‘‘ (ص۔ 09)

یہ کتاب ڈاکٹر عبدالعزیز عرفان کے مضامین کا مجموعہ ہے ساتھ ہی ساتھ یہ تحقیقی علم میں اضافہ کی حیثیت رکھتی ہے ۔ ڈاکٹر عبدالعزیز اردو زبان کے علاوہ عربی ، فارسی اور انگریزی زبان پر قدرت رکھتے ہیں ۔ یہ کتاب ایک اہم مضمون ’’انڈیا ونس فریڈیم‘‘ یعنی ہندوستان کی آزادی کی آخری انگریز تصنیف 1988ء میں دہلی ہائی کورٹ کے آڈر پر منظر عام پر آچکی ہے ۔

زیر نظر کتاب ’’مولانا ابوالکلام آزاد: ایک تاریخی مطالعہ ‘‘ میں عبدالعزیز عرفان کے کل14مضامین شامل ہیں جن کے مختلف نام اس طرح ہیں ۔ (۱)عرض ِ مصنف : ڈاکٹر عبدالعزیز عرفان (۲)ایک تاثر : مؤلف ڈاکٹر شاہدہ مناف (۳) اردو ادب میں تاریخ نگاری (۴) مولانا آزاد بحیثیت ایک بے مثال ادبی شخصیت (۵) مولانا آزاد کی تحریک آزادی میں شمولیت ‘‘ (۶) مولانا آزاد عدالت کے کٹہرے میں (۷) مولانا آزاد کا تاریخی شعور وادراک (۸) مولانا آزاد کے بیرونی ممالک کا سفر (۹) مولانا آزاد کی تعلیم کے بارے میں (اعتراض کا جواب)(۱۰) مولانا آزاد تقسیم بنگال سے تقسیم ہند تک (ایک سرسری جائزہ )۔مولانا آزاد کی خودنوشت سوانح عمریاں (مختصر جائزہ ) (۱۱) تذکرہ (۱۲) آزاد کی کہانی خود ان کی زبانی (۱۳) غبارِ خاطر (۱۴) انڈیا ونس فریڈم(ہماری آزادی ) وغیرہ ۔ یہ تمام مضامین اپنے آپ میں قابل تعریف ہیں۔ ڈاکٹر عبدالعزیز عرفان اس کتاب سے متعلق خود لکھتے ہیں :

’ ــــزیر نظر کتاب ’’مولانا ابوالکلام آزاد:ایک تاریخی مطالعہ ‘‘ بھی مختلف مضامین کا مجموعہ ہے ، جس میں مولانا آزاد کے بارے میں عنوانات کے تحت مضامین سپرد قلم کیے گئے ہیں ۔مولانا آزاد کی اور بیرون ِ ممالک کے سفر کے متعلق اعتراضات کیے گئے ہیں تو ان کا جواب تاریخ کی روشنی میں تحریر کیا ہے ۔ مولانا آزاد تعلیم حاصل کرنے کے لیے الازہر یونیورسٹی گئے تھے ، جس کے لیے بیرونی ممالک کا سفر کیا تھا اور وہ انگریزی زبان سے واقف نہیں تھے؟، ان کے سوالات کے جوابات میں روشنی ڈالی ہے ، تمام مضامین مولانا ابوالکلام آزاد اور ان کے تاریخی واقعات پر مشتمل ہیں ، اس لیے کتاب کا عنوان ’’مولاناابوالکلام آزاد : ایک تاریخی مطالعہ ‘‘ رکھا ہے یہ مضامین مولانا آزاد کے بارے میں روشنی ڈالتے ہیں ، نئے گوشوں سے بھی واقفیت ہوتی ہے اور ان کے تاریخی نقوش اجاگر ہوتے ہیں ۔‘‘(ص۔05)

یہ کتاب معلومات کی حیثیت سے بھی کافی مفید ثابت ہوگی ۔ ڈاکٹر عبدالعزیز نے بہت خوبصورت کتاب منظر عام پر لائی ہے ۔یہ کتاب نہ صرف قارئین کی معلومات میں اضافہ کرتی ہے بلکہ مولانا آزاد کے تمام پہلوؤں کو اجاگر بھی کرتی ہے ۔

زیر نظر تبصرہ کتاب ’’مولانا ابوالکلام آزاد: ایک تاریخی مطالعہ‘‘ میں تقریباً ۱۴ مضامین ہیں ۔ہر ایک مضمون قابل ذکر ہے ۔ یہ کتاب کی اہمیت کو بھی بڑھاتی ہے ۔ ڈاکٹر عبدالعزیز لکھتے ہیں ۔

’’مختصر یہ کہ ہماری آزادی مولانا آزاد کی دلی جذبات کا اظہار خیال ہے ۔ جو ان کے دل میں پوشیدہ تھے ۔ جن باتوں کو وہ ناپسند کرتے تھے انہیں تحریری طور پر ان اوراق میں بیان کیا ہے۔مولانا کے بیشتر خیالات اور رائے بحیثیت کانگریس صدر تھیں ، لیکن آخر میں انہیں مایوس ہونا پڑا۔ خصوصاً ۱۹۴۶ء ،۱۹۴۷ء،اور ۱۹۴۸کے چند واقعات اور حالات سے مایوس ہو چکے تھے ۔ یہی وجہ تھی کہ انہوں نے عہد صدارات قبول نہیں کیا تھا ، چنانچہ آپ نے ساتھیوں سے اپنے اختلافات یا ان کے تئیں اپنی ناپسندیدگی کی جانب اشارے کئے ہیں ۔غبارِ خاطر کی طرح دل کا غبار نکلا ہے۔‘‘(ص،127)

اس سے یہ صاف ہو جاتا ہے کہ یہ کتاب ایک بہترین کتاب ہے ۔ یہ مولاناابوالکلام آزاد کے متعلق اضافہ کی حیثیت رکھتی ہے ۔ ڈاکٹر موصوف کی طرزِ تحریر بھی بالکل صاف اور سادہ اور عام فہم نظر آتی ہے ۔زبان آسان ہے اور بیان کرنے کا انداز بھی بہتر ین ہے۔ جس سے قارئین کو بالکل سمجھنے میں بآسانی ہوگی ۔ یہ کتاب ڈاکٹر عبدالعزیز عرفان کی عمدہ کا وش کا نتیجہ ہے ۔ سرورق دیدہ زیب ہے اور کاغذ عمدہ ہے ۔ ٹائپنگ کی غلطیانہ کے برابر نظر آتی ہے ۔ اس کے تمام مضامین بے حد دلچسپ ہیں، قارئین اس کا مطالعہ کیے بغیر نہیں رہ سکتے ہیں ۔

٭٭٭